8. రామాయణమునకే రమ్యమగు కాండ

 8. రామాయణమునకే రమ్యమగు కాండ
 పల్లవి....రామాయణమునకే రమ్యమగు కాండ

            సుందరమ్మగు కాండ సుందరా కాండ
   1.    సీతా మహా సాధ్వి శాంతినొందిన కాండ
          రామ దేవుని మది రంజిల్లిన కాండ
          వీరాంజనేయుని విజ్రుమ్భణపు కాండ
          వానర శ్రేష్ఠునకు  వరమైన కాండ
    2.   రావణుని లంకలో రగడ జరిగిన కాండ
          రాక్షసుల గర్వము భంగ పరచిన కాండ
          రక్కసి మూకలను రచ్చకీడ్చిన కాండ
          దశకంఠునకు దడ పుట్టిన కాండ
   3.    అక్షయ కుమారుని హతమార్చిన కాండ
          అంజని సుతునకు అత్యద్భుతపు  కాండ
          మారుతికి తన బలము తెలిసిన కాండ
          లంకా దహనమ్ము జరిగిన కాండ
   4.    వాలముతోడ లంకాదహనము - వరమని తలచెను వాయు తనయుడు
          అగ్ని దేవుడే అనుగ్రహించెను - ఆశీర్వాదము పొందెను హనుమ
          ఆహుతి చేయుట కుపక్రమించెను - లంకా రాజ్యమే ఆహుతి ఆయెను
          సంపద అంతయు సమూలమ్ముగా - దగ్ధమాయెను ధనగారములు
          అగ్ని జ్వాలలే ఆకసమంటెను - అగ్ని దేవునకు ఆకలి తీరెను
          అశోక వనమును హనుమ దర్శించే - హరిత వనమ్మై హాయిని గొలిపె
   5.    రామునకు హనుమన్న ఆప్తుడైన కాండ
          మైత్రీ బంధమున మహిమాన్వితపు కాండ  
          మరుతాత్మజునకు మరపు రాని కాండ
          ఆలింగనముతోడ హాయి గొలిపిన కాండ
                      రచన: కొడవంటి సుబ్రహ్మణ్యం